Walang patid ang sinag sa aking silid
Sa gabi ma’y ilaw pa rin ang nasa paligid
Pagod ay tulog at pahinga’y nag-iibayo
‘Pag ang turing na sa sarili’y makina’t di tao
Dahil kakaiba talaga ang higpit at lupit
Ng kusampalong humahagupit
Na siyang anak ng kapanagutang
Kailanma’y di magawang matalikuran
Tinik ang kasipagan sa mabuting kalusugan
Sa ating mundong nagmumulto ang araw
Uhaw man sa tulog, katungkula’y di tutulugan
Busog man sa antok, pagtutupdan ang pinangakuan
At paghiga sa kama’y parating n’ang liwayway
At muling babango’t iwawaksi’ng pananablaw
Gan’to po sa amin, sagana sa sipag
Gan’to po sa amin, salat sa tamad
Gan’to po sa amin, patay ang kalusugan
Sa harap ng kapangyarihan ng katungkulan
